|
ISABELA - Uppat a premiado a mannurat ti pinadayawan ti Timpuyog dagiti Mannurat iti Iloko iti Filipinas (TMIF) iti Lifetime Achievement Award ita a tawen, iti seremonia kabayatan ti First International Literary Convention ken Writing Seminar a naangay iti Camp Samal, Tumauini, ditoy idi Oktubre 24-26.
Napadayawan gapu kadagiti naruay ken naindaklan a gapuananda iti Literatura Iloko ken iti pannakatan-ay daytoy da Pelagio A. Alcantara (posthumous award), premiado a piksionista ken mannaniw, maestro, ken sigud a regional director ti Philippine Information Agency iti Region I; Donel Pacis, award-winning writer iti Ingles ken Iloko, sigud a taga-Vintar, Ilocos Norte ngem agnaeden idiay Sacramento, California; Lady Fele Mann iti Darwin, Australia (ni dati a Feliciana J. Abril, taga-Binalonan, Pangasinan ken agsursurat iti Bannawag idi 1960s ken '70s); ken Atty. Nole V. Lansangan, pabliser ti Salinong, agbinulan a pagiwarnak iti Iloko a pakaipabpablaakan kangrunaanna dagiti gapuanan dagiti agdadamo a mannurat nga Ilokano. Naited met iti nasao a pasken ti premio dagiti nangabak iti salip iti sarita ti T. Gabriel Tugade Literary Awards a nangpadayaw kadagiti kapipintasan a sarita a naipablaak iti Bannawag iti 2007. Indauluan da Joel B. Manuel ti Banna, Ilocos Norte ken Errol L. Abrew ti Caba, La Union dagiti nangabak iti umuna ken maikadua a gunggona kas panagsaganadda. Inawat ni Manuel ti cash prize a P15,000 ken sertipiko ti pammadayaw babaen ti saritana a "Ken ni Pidut: Dagiti Daton iti Angpe"; idinto a P12,000 ken sertipiko ti inawat ni Abrew, editor ti Regional Diaryo iti Region I, para iti saritana nga “Agpapadakami Amin.” Dadduma pay a napadayawan: Maika-3: Aida C. Tiama, taga-Pangasinan ken empleado ti Unibersidad ti Filipinas, P10,000 ken sertipiko para iti saritana a “Ti Agdadait”; Maika-4: Clarita A. Sumahit, retirado a propesora iti University of Baguio, P5,000, iti saritana a "Ni Doktor Danny, Ni Ma'am Ela"; Maika-5: Danilo Antalan, broadcaster ti DZTP iti Candon City, P3,000, iti saritana a "Dalusapi"; ken Maika-6: Fernando B. Sanchez iti San Nicolas, Pangasinan, babaen ti saritana a "Manso", ken Giovanni Palomares iti Bacarra, Ilocos Norte, iti saritana a "Pinadis"; sag-P1,500. Naited dagiti premio ken sertipiko babaen ken ni Jaime Atayde, mamagbaga ti MIF ken kameng ti Sangguniang Panlalawigan ti Isabela, iti nagan ni Terry Tugade nga esponsor ti nasao a pasalip. Ni met laeng ni Tugade, mannurat iti Iloko a taga-Marcos, Ilocos Norte ngem maysan a negosiante iti San Francisco, California, ti nangesponsor iti Lifetime Achievement Awards. Nasurok a 100 dagiti partisipante (96 dagiti nagrehistro) a naggapu iti Ilocos, Baguio, Tanap ti Cagayan ken ballasiw-taaw ti dimmar-ay iti pasken nga insayangkat ti TMIF babaen ti pannakitinnulong ti Timpuyog dagiti Mannurat nga Ilokano-Global a nakabase iti Honolulu, Hawaii.# |
News 
