|
STA. BARBARA, Pangasinan - Saan pay laeng a makaanges iti nalukay dagiti police personnel a di pay naimplikar iti naraut a laboratorio ti droga iti maysa a barangay iti Naguilian, La Union agsipud ta agtultuloy ti inbestigasion, segun iti PNP regional director.
Kinuna ni P/Chief Supt. Luizo Ticman a madama pay laeng ti panagpalutpot ti Camp Crame mainaig kadagiti adda direkta wenno saan a direkta a pannakainaigda iti naraut a laboratorio ti droga iti Barangay Upper Bimmotobot, Naguilian, La Union uray kalpasan ti pannakaipila dagiti kaso maikontra kadagiti akusado a polis iti korte ti La Union. Addan 26 a polis manipud iti Region I a nakasuan iti korte a pakairamanan ni Supt. Dionicio Borromeo, dati a hepe ti polis ti Dagupan City. Impanamnama ni Ticman a rummuarto ti pudno ket asinoman nga adda pannakainbolbarna iti operasion ti nasao a laboratorio ti droga ket sagrapennanto ti resulta ti aramidna agsipud ta independente ken saan a mabalin a malimlimuan dagiti inbestigador. Kabayatanna, iti sabali nga interbiona, kinuna ni Ticman nga iti panagtakemna kas regional director, awanton ti panagpipinnabasol ti kapolisan mainaig iti kampania iti droga. Kinunana a maipasdek ti nalawlawag a pagrebbengan dagiti hepe ti polis ken provincial director iti kampania maikontra iti illegal a droga ket agbalinda a direkta nga akinresponsible kadagiti illegal nga aktibidad ti droga iti saklawda a lugar. Kinuna ni Ticman a direkta a responsible kenkuana dagiti hepe ti polis mainaig iti kampania maikontra iti panaglakuan iti droga iti kalkalsada idinto nga innayonna a ti met provincial director ti accountable no adda madiskubre a laboratorio ti droga iti lugar a hurisdiksionna. Kinunana pay nga ituon ti provincial director ken ti regional anti-illegal drugs special operations task group ti kampaniada kadagiti high-value wenno kalidad a puntiriada kas kadagiti laboratorio ti droga. Kinuna ni Ticman a babaen ti nalawlawag a pagrebbengan dagiti hepe ti polis ken provincial director, awanto ti panagtitinnudo no sino ti yan ti panagliway wenno basol iti panagraira ti droga iti hurisdiksionda.# |
News 
