|
CANDON CITY - Naitandudo dagiti kultura dagiti minoridad ditoy probinsia kas iti Bago, Tingguian, Itneg, Kankanaey ken dadduma pay iti kaunaan a BEGNAS Ylocos 2008 a naangay itoy a siudad manipud Oktubre 28-30.
Segun ken ni Leon Lais, dati a mayor ken maysa kadagiti mabigbig a tribal elder iti San Emilio, ti BEGNAS ket maysa a wagas a panagyaman dagiti indigenous people ken ni Kabunian kalpasan ti panagapit babaen ti panangiruknoyda iti baboy ken salsala. “Manipud pay idi un-unana a panawen nga ar-aramiden dagidi appomi ti BEGNAS,” inlawlawag ni Lais. Kinuna met ni Gob. Deogracias Victor “DV” Savellano a babaen iti daytoy a selebrasion, mapagkaykaysa dagiti amin a tribu tapno mapreserba ti kulturada ken malapdan ti pannakapukaw dagitoy. “Napintas ti apit ita a tawen ket rumbeng nga agyamantayo ken ni Apo Kabunian.Matagutago tayo am-in (Agbiagtayo amin)” indir-i ti gobernador iti pannakailukat ti ritual ti BEGNAS a nakipartisiparan ti 23 a munisipalidad nga addaan iti tribal barangays. Inkari met ni 2nd District Representative Eric Singson a sisusuporta ti opisinana iti kastoy a parambak sana innayon a napagpatangandan ken ni Gob. Savellano a tinawen nga isayangkatda ti BEGNAS Ylocos. Iti Search for Miss Baggak ti Daya 2008 idi Oktubre 29, inyawid ni Cherry Rose Pineda ti Salcedo ti korona ken premio a P20,000, first runner-up ni Diannne Tongol ti Sta. Cruz ket nakaawat iti P20,000, ken second runner-up ni Rukaiya Dagian ti Gregorio del Pilar a nangiyawid iti P10,000. Iti minor awards, napili a best in talent, star of the night, best in swimsuit ken best in long gown ni Dianne Tongol; best in costume ni Maribel Sabuquel ti San Emilio, Miss Photogenic ni Clariss Domenden ti Sta. Cruz, Ilocano’s Choice ni Cherry Rose Pineda ken Miss Friendship ni Rukaiya Dagian. Nagkampeon met iti traditional ensemble ti San Emilio, idinto a nagpuesto ti Quirino, Gregorio del Pilar, Galimuyod ken Lidlidda iti maikadua agingga iti maikalima. Inyalat ti Sarmingan, Narvacan ti umuna a puesto iti chorale competition a naangay iti maudi nga aldaw ti parambak. Binagi met ti Pidpid, Sta. Cruz; Cadanglaan, Magsingal; Bugnay, Candon City ken Nagsingcaoan, Cabugao ti maikadua agingga iti maikalima a puesto kas panagsasaganadda. Ti tema ti BEGNAS Ylocos: “Agbiag ti Kaugalian a Nainsigudan”# |
News 
