Tawid News Magasin: Ilocano News, Literature and Community Portal

Kasla adda bombilia a nagsilaw iti lulonan ni uliteg idinto a nagtangad a nangbukilad iti bobeda.

“Dandani makalawas gayamen a diak pimmusta. Bay-amman ta padaanak ni Pari Romeo inton bigat,” inyisemna.

“Kasta a, angkel, umisemka. No saanka a mangabak iti hueteng, amangan no mangabak manen dagiti estoriam iti kontes isu a dika unay,” impasablogko manen.

“He! He! Agyamanak, Eugene kaanakan, iti pananglawlawagmo kaniak. Saanak pay ketdin nga agpannuray kadagita imbagam. Addan napanunotko a sigurado. Isingasingko nga alaenmi ni gobernador kas principal sponsor. Uray ta dandanin eleksion.”

“Met la gayam. Ala, isardengta ngarud ti aginumen, uliteg, ta inton bigat, aramidem aminen dagiti napanunotta a posible a solusion,” inggibusko ket timmakderakon iti tugawko.

MALEM ti Domingo. Nupay ammok nga adda danagna, padpadasen ni uliteg nga ipakita nga adda panagtalekna iti kabaelanna. Nakarubuat metten da Anti Mayyang ken Jun a kaduami a dumanon.

Kayat itay ni Anti nga ayabanda ni Lakay Muyan a mangalbasia ngem impetteng ni uliteg a kabaelanna nga ilikus ti alipuspos ti ab-abalayanenna.

Ibaddekko koman ti siliniador idi kasla imbiat a pana ni uliteg Antokoy a dimsaag iti dyip. Pinasardengna ni Romeo a kubrador.

“Itiramman tay nakasikog a baro, pare,” immandar ni uliteg.

“6-26 a ngarud, pari. Mano?” inagawaan ti kubrador ti nagikur-it iti maris-rosas a papelitona..

“Ipustak aminen tay TF ko nga inted ni Bokal Jeff Manantan idi ininterbiok idi kalman,  he! he!” narabuy ti isem ni uliteg a nangiyawat iti nasikkil a ninoy.

“Apo, itudom sa metten, pari,” ingngirsi ni Romeo idinto nga impisokna ti kuarta iti belt bagna.

“Mammaminsan, pari, ti panagakup iti kuarta. Imbag la a pakairamanan iti kuarta tay gambling lord nga opisialtayo,” inlangit ni uliteg a kasla konkuntarennan ti maibulsana no maitsambana. Iti panunotko, mapan a dos sientos mil ti abakenna no kas pangarigan.

“Ala, intayon ket maladawtayon,” indagdag  ni Anti Mayyang ket pinataraykon ti lugan.

Mapan a maysa nga oras a tinaray ti dyip sakbay a nadanonmi ti pagtaengan ti nababaian. Manipud ngamin iti sentro, agarup pito a kilometro pay ti natapok a kalsada ti inunormi tapno magtengmi ti barangayda.

“Nagladawkayon?” impasabat a dagus  ti natayag, napugot ken karuprupa ni Hulk Hogan a lalaki. Nalabit nga isu ti ama ti nobia ni Jun.

“Medio naiyaw-awankami ngamin, abalayan. No nagseksek met gayam ditoy pagariam he! he!” napnuan pasig nga insungbat ni uliteg.

“Dinak aw-awagan iti kasta ta dita pay nalpas a nagrinnisut. Ken dimo ibaga a naseksek ti lugarmi ta addakayo iti Ammubuan  City,” inkusilap tay karuprupa ni Hulk Hogan.

“Ala wen, padre, ngem uray iti Pakidilutan ti lugarmi, nasitsiti a ti ayanmi ta addakam iti haywey, adu ti lumabas a Pantranco,” imbikag met ni uliteg nga ad-adda pay a namagsabat iti kiday ti lakay.

“Immaykayo dumanon wenno makidebate?” kinunana iti nakersang a boses.

“Agpada este dumanon, padre,” imbeddal ni uliteg agsipud ta nasiripna ti aglatlati a karbin a naipasikig iti ruar ti dos grados a balay.

“Ala, dumanonkayo,” inyopresar ti lakay.

Nainayad a kasla pabitay ti pagna da Anti Mayyang ken Jun a nakadumog pay idinto a kasla garaw ti di makaarem a pusa ni uliteg Antokoy a nanggabbay pay iti ab-abalayanenna. Inyagawak met ti simmurot tapno mangngegko ti saritaanda.

“Ita ta agsasangotayon, kayatko ti prangka ken direkta a patangan,” inrugi ni Hulk Hogan. Agab-abay itan a nakadumog da Jun ken Nadia a nobiana idinto a nakakomportable met ni uliteg iti nagtugawanna.

“Sakbay, padre, a rugiam nga ilitania dagiti kayatmo a maaramid, iyam-ammok man pay ti bagimi. Siak ni Jose Recacho Madriaga a.k.a. Kumander Antokoy, maysa a journalist idinto a Mayyang met ti nagan ni bumaket. Ni met Eugene a kaanakak daytoy,” kinuna ni uliteg.

“Siak met ni Godofredo Palacay Jr. nga ama ti nangdapil iti unas ti anakyo. Adda met iti Estados Unidos ti asawak a ni Diana isu a solok ita a nadanonyo. Diak nagayab iti sabalin ta diak kayat ti matsismis,” inyam-ammo met ni Tang Godo ti bagina.

“Kas nakunam, padre, nalpasen a nadapil toy unas ni Jun a putotko. Ket kas natakneng a pamilia, dawatenmi ngarud iti nadaeg a biangyo ti panangiyawidmin iti dadapilanyo yantangay makita metten ti kinaepektibona,” intiran ni uliteg ti nagtagisabong a dilana.

       (Adda tuloyna)