|
VIGAN CITY - Saan a maipangato ti sustaining membership fee ti Boy Scout of the Philippines a tinawen a baybayadan dagiti agad-adal iti elementaria ken sekundaria iti Ilocos Sur.
Impakaammo ni BSP Ilocos Sur Council OIC Gil Savellano a saan nga inaprobaran ti BSP Provincial Council a maipangato ti nasao a membership fee bayat ti miting ti council idi Agosto 11 iti provincial capitol. Agtalinaed met ti P40 a regular membership fee a masingir kadagiti mayat nga agkameng iti BSP. Sakbayna, kiniddaw ni Savellano a maipangato ti sustaining membership fee iti P10 manipud iti agdama a P5 tapno masustener ti scouting movement iti probinsia. “Sipud addan puotko, lima a pisosen ti masingsingir (sustaining membership fee). No ditay ingato ita amangan no saanen nga agtuloy ti scouting ditoy,” palawag ni Savellano. Kinuna ni Savellano a ti laengen Ilocos Sur ti agsingsingir iti P5 kas annual membership fee iti intero a Rehion Uno isu a kiniddawna a maipangato metten ti singiren ti konseho a membership fee. Ngem saan a sinuportaran dagiti BSP District Coordinators ken dadduma pay a kameng ti konseho ti singasing. Kinuna ti maysa a kasapulan ti legal a basehan tapno makombinsirda iti daytoy a gakat. Segun kadagiti dadduma a kameng, maysa a national movement ti scouting ket rumbeng nga aggapu iti national council ti pammilin a maingato ti nasingir a sustaining membership fee. Segun ken ni Savellano, agpeggad a maawan ti aganay 8,000 a cub scouts gapu iti DepEd Order #19 series of 2008 nga impaulog ni Education Secretary Jesli Lapus a saanen a mabalin a piliten dagiti estudiante iti Grade I agingga iti IV nga agkameng iti BSP. Kabayatanna impakaammo ni Mayor DioCaesar Suero a sangailien ti Cabugao ti sumaruno a BSP provincial jamborette sakbay nga agtapos ti tawen.(Mancielito S. Tacadena/NBN Vigan) |
News 
