Tawid News Magasin: Ilocano News, Literature and Community Portal

Nasinga ti panagpampanunotna idi naglukat ti ridaw, ngem sabali ti dimteng. Daydiay natarabit, saan a gagangay ti introna, kasla adda iti sabali a lubong iti sabali a panawen. Uray la ngimmato dagiti kidayna, wid matsing libbi.

Gagangay a natuktok koma iti namitlo ti ridaw wid matching voice from the outside: “Nak! Nak!” sa kalpasanna, nailukat koma a kagiddan ti ‘Bulaga!’ Sumarunon ti saan nga agpatingga a kuestion.

Linibbian ni Michael ti simrek a sangaili. Dina a masinuo no makasangsangit wenno kalkalpasna a nagsangit. Naannad ketdi ti sangaili iti panangilukatna, kasta met ti panangiserrana iti ridaw.

Nagmurareg ni Michael a nangisurot ti kanawan a taldiapna iti sarugaddeng nga addang ti  simrek a nakadumog  a nangkamang itan iti immaratiddog a marisan a sopa. Sarugaddeng nga addang a kunam no balud nga agturong iti death chamber para iti maudin a kanito ti biagna. Inayad ti panagtugaw ti sangsangpet a kunam la no dina kayat ti makaaramid iti kaluskos. Rinam-edan pay daytoy ti iking ti sopa iti kiyyetna. Iti pannakatukkol ti tengnged daytoy, saanen a mabasa ni Michael ti nalawa a muging iti maratimmukel a rupa.

Simmeksek iti muging ni Michael ti dua a banag: pinagungtan ni mamangna wenno mailiw? No napagungtan, nalaka a solbaren, a kas kalaka iti mamiso a betsin. Ngem no mailiw, kas karigat met laeng iti mangsolbar iti kuestion ti asignatura a calculus. Nakudkod ni Michael ti di met nagatel a mugingna. Muging nga agkedked a mangburak iti ulimek.

Sinublian ni Michael a minira ti monitor ken minusiigan ti program a kalkalpasna nga inaramidan iti debugging process. Projectna daytoy iti Computer 417 wenno Software Engineering. Maysa a software nga Ilokano nga ay-ayam iti kompiuter maipapan ti innaduan iti magatud a tabako a birhinia ken pinnartakan iti panangtudok. Sinuratna daytoy babaen kadagiti platform ti Java, Phyton ken Ruby language.   

Tinaldiapan manen ni Michael ti sangailina: nakailad a nakakukot. Nakakidem. Pinagpungananna dagiti imana. Nakasikig a simmango kenkuana. Nalislis ti tisertna nga asul a nangiparang iti napudaw a buksit ti kalalainganna a pammagi. Gagangay laeng ti tayagna iti edad a walo. Nakaputot iti maong.

Naamiris ngata daytoy a serioso ti nadatnganna ta uray la intapayana  ti mulagatna iti monitor ken di nagtimek ta nalabit a dina kayat ti makasinga. Adda met utek daytoy nga ubing ta maikadua a kanayon iti klase tunggal panagtuturpos. Nalabit nga immala iti inana a cum laude idi nagturpos iti kolehio, sa inayon pay ti kinagagetna nga agadal kadagiti leksionna. Bugtong nga anak.

“Advance happy birthday…!”

Ngem awan ti nauray ni Michael a sungbat, a kunam la no access denied iti kompiuter gapu ta di umno ti password. Di pay nagkir-in wenno nagkuti ti nakailad nga ubing.

Solo ni Michael nga agnanaed ditoy one room apartment a kukua da Myla. Trese a tawenen nga agup-upa. Dagiti man kaarubbana a babbalasang ti mangibagbaga a karuprupana ni Piolo Pascual. Saan a nairuam a rummuar no di naurnos ken nadalus ti kawesna. Saan met a nairuam a nakamisuot.

Talloda nga agkakabsat. Adda sadiay San Diego, California dagiti nagannakna nga agpada a nurse, kasta met ti buridekda a babai a nurse met laeng. Adda ti inaunaan a lalaki sadiay Ilocos Sur iti sidong ti pamiliana ken agnanaedda iti family houseda. Iti laksid a kanayon a maimbitaran iti pasken ken masansan ti pannakasiputna a palpaludipan dagiti babbalasang a kaarrubana, nga adu dagiti pagayamna a babbalasang a direkta ken indirekta a mangiparparipirip iti ayat, baro pay laeng iti edadna a sarado tallo a dies.

Adda daan a kansion a naidalimanek iti baul ti barukong ni Michael. Kayatna a yaon ti kansion ngem awanan iti bileg a mangiyaon. Daydiay koma kas kabileg ti agus ti nagdinakkel a karayan a mangbaliw iti rupa ti maysa lugar. Awanan iti bileg a mangiyaon iti kansion ta dina ammo no sadinon ti pakasarakanna iti ridaw ti baul tapno maidaton koma iti nakaisangratanna.Tapno saan a masagid dayta a kansion, ginaburanna ti panawenna kadagiti ubrana iti trabaho, sa ita ti panagiskuelana iti information technology. Insamirana ti agbasa iti rabii ta dina kayat a nakatunganga a panawan ti bandwagon ti cyber highway. Ken maysa, itoy a panawen, katakunaynay ni mannurat ti computing system. Sports editor ni Micahel iti linawas a pagiwarnak iti Siudad dagiti Saleng. Agsursurat iti feature ken essay ken fiction kadagiti nadumaduma a magasin ken pagiwarnak.

“Ania ti kayatmo a regalo, balong?” binurakna ti makatitileng nga ulimek idi dina met la maurayen nga agtimek ti ubing.

“Diakon agbertdey, ninong…diak kayat iti agbertdey…”

      (Adda tuloyna)