Tawid News Magasin: Ilocano News, Literature and Community Portal

“O! paniero,” kasla abogado ni Godofredo a nagdeppa iti agdan.

“Ne! sika met gayam, pards. Asensokan a.”

“Nakakali datao iti balitok, pards,” pinagkawikaw pay ni Godofredo ti tanganna. “Apay a kas kasidunget ta rupam ti tiempo?”

“Ni Nanang, iyasawanak kano ken ni Emiliana, pwe!” intuprana.

“Spiking of Emiliana. Inta kumanta diay videokena. Nabayag a dita nagjamingen ket. Mayat ti uminom no kastoy nga agtudtudo.

“Huh, bay-amon no dita yanda balkat.”

“Intan, pards,  siak ti bahala ita ta nakapatamaak iti hueteng. Ken adda napintas a serbidora ita sadiay. Tagala ‘giyem.”

“Kasta, aya?” kasla nakangngeg a tuleng ni Eugene.“Inta man ngarud ispatan.”    

Umun-unegda pay laeng iti videoke bar, sinabat ida ni balkat. Ngem saan nga intaltalek ni Eugene. Nagtarus iti lamisaan iti igid. Manmano pay ti kustomer.

Nagorder a dagus ni Godofredo iti sagduduada a serbesa. Nagtalangkiaw ni Eugene. Adda dua a babbai iti asideg ti counter. Nalapsat ti maysa. Gimmitara ti bagina. Namindua a nagliddok ti karabukob ni Eugene. Kursunadana ti babai.

Madamdama, nakakantan iti saggatlo dagiti dua. Naibus metten tay sagdudua boteda a beer.

“Naibusen toy isisiatta.”

“Don wori, akong bahala,” inkidday ni Godofredo. Nagsipat.

Dagus nga immasideg ti seksi a serbidora.

“Miss, apat na beer pa nga.”

Inyam-ammo ni Godofredo ti serbidora ken ni Eugene.

“Siya si Gene, pare ito naman si Trixy.”

“Helo,Trixy. Ang ganda mo,” impakat ni Eugene tay ul-ulesanna a tagalog.

Kasla naayatan met ti balasang ket pinidilna pay ti agong ni Eugene.

“Trixy, maupo ka sa kanan ni Pari Gene,” kiniddayan ni Godofredo ni Eugene.

“Walang magagalit, Gene?” nagrukob a nangpallilit ken ni Eugene.

Nagkabalio ti barukong ni Eugene idi maitangkarang iti matana dagiti napudaw a puon ti barukong ni Trixy.

“Ama! Ama!” nagtilmon.

“Bahala ka nang mang-enterten sa kaibigan ko, Trixy,” kinuna ni Godofredo. “Sandali lang, magjelling ako.”

“Ano pala trabaho mo?” inamad ti babai.

“A kwan… engeneer ako e!” inlastog ni Eugene nupay peon laeng iti konstruksion.

“O! di marami ka ng pera ngayon?”

“Oo a!” inggiddanna nga inaprosan ti napudaw ken nasippukel a luppo ni Trixy.

“Ano naman ang project nyo ngayon?” umis-isem a sinaludsod ti balasang. Dina inikkat ti dakulap ni Eugene iti luppona.

“Ne, mayat sa,” nagkulibagtong ti uneg ni Turcuato.

“A kwan e! nagbabangon ako ng balay e,” impasaksak lattan ni Eugne ti tagalogna.  Uray la nagayek-ek ti balasang.

“Wala nang laman ang baso mo,” kinuna ni Trixy. “Order pa ako, ha?”

“Ol di taym!” kinuna ni Eugene. Nagbilin iti saggapat a serbesa.

Nagsubli ni Godofredo. “Pinnatnaganen daytoy,” kinunana. “Rambakantayo ti panagam-amoyo ken ni Trixy!”

“Wen, pinnatnaganen!” uray la nagsapri ti ngiwat ni Eugene iti panagsaona.

Rumabiin. Ad-addan ti pigsa ti tudo. Napunnon ti nagawanganen a botelia iti rabaw ti lamisaan. Agannawilen ni Eugene.

Is-isudan ken ni Godofredo nga agin-inum.

Tumakder koma ni Eugene tapno mapan umisbo ngem agibar metten. Nakirat dagiti botelia.

“He! He! He! Awan, senglot ka na, ‘adre,” kinuna ni Godofredo.

“Hoy, saannak a singlot!” kinuna ni Eugene. “Saan nga agsanud daytoy iti innuman!”

“Mangalaak ngarud iti sabali a katebolmo tapno maymayat ti panaginumta,” kinuna ni Godofredo.

“Dayta ti magustuak kenka, pare, ta ammonak a pagustuan a gayyemmo!” linengngesna ti botelia sana inarub-ob. Sana la indisso idi awanen ti naggianna.

Pinarukiban ni Eugene ti sumungsungad a babai. Ama, anian a nagsippukel!

Immabay kenkuana ti babai. Kasla makurkurikoran ti agong ni Eugene iti ingget banglo nga ayamuom ti katebolna. Ngem apay metten a saguyepyepen?

Nagkiremkirem ngem dinan maingato ti kalub ti matana.

Naitugkel ti subsob ni Eugene iti lamisaan. Kasla tagtagainep laengen ti panangulod kenkuana ni Godofredo nga inserrek iti maysa a siled...

Napabaringkuas ni Eugene. “Nagdakesen a tagtagainep.” nakunana iti bagina.

Naklaat idi mataldiapanna ti babai iti sikiganna. Ni Emiliana!

“Apay nga addaak ditoy?” nagrupanget ni Eugene.

“Dimo matandaanan? Pinaayabannak a makitebol kenka. Sa idi kuan... inserreknak iti kuarto ket....”

“Sal-at a Godo. Sigurado a kinumplotmo a mangbartek kaniak!”

“Ania ti kayatmo a sawen, dinak itungpal? Kalpasan ti nagpatnag a panagpapasmo kaniak?” nagbaniekes ni balkat. “Saan a mabalin! Ammom ti dusa dagiti reypis a kas kenka, bitay!”

Kellaat a naawan ti hang-ober ni Eugene. Ay, dina la ketdi kayat ti agtangad iti barsanga. Kasla masiluan ti subsobna a nangtaldiap ken ni balkat. Ngem ania pay, daytoy ngata a balkat ti naikari a gasatna...

“Agsukatkan ta inta diay ayanyo,” nakalalailo ni Emiliana a nangagek iti lengnges ni Eugene. “Dika madanagan, en grande ti kasarta. Siak amin ti aggasto!”

Kalpasan ti pito a bulan, kasla naglupos ni Eugene a beklat. Isu itan  ti manager ti Videoke Bar. Isun ti mangtartarawidwid kadagiti nalawa a talonda ken dadduma pay a negosioda ken ni Emiliana.

Saanen a rumrummuar ni Emiliana ta masikog. Segun iti doktor, triplets ti sikogna. Agasem, tallo a dagus ti ganansiada!

Napaisem ni Eugene. Uray kaskasano, natungpalna met laeng ti arapaapna. Babaen ken ni balkasia,  nagbalin a hasiendero.#