Tawid News Magasin: Ilocano News, Literature and Community Portal

Nanabsiit ti kimat sa sinaruno ti makapleng a gurruod ngem saan nga intaltalek ni Eugene. Dandani payen lumsot dagiti matana a mangbuybuya iti agdigdigos a balasang.

Nalipatanna manen a namin-anon a naireklamo iti kapitan gapu iti panagsiripna ken iti panagkarina a saanna nga ul-uliten nga aramiden.

Saan la a naminsangapulon a nagtaraken iti kammuol gapu iti pannakasukalna a nagsirip ngem kaskasdi a saan nga agnakem.

Dina nadlaw a nasalaponna gayam dagiti abuos ket nagwara dagitoy. Sumagmamano ti simrek iti pantalonna ket dina naalluadan ti nagkanuskos. Nagpallayog ti sanga nga ayanna ket iti pannakatukkol daytoy karaman a natnag iti baba.

Nakigtot ti balasang  iti kanabtuog iti asideg ti pagdigdigosanna ken ti asug ni Eugene ket nagikkis. Sappuyot ti imana ti kutitna, timmakder ni Eugene ket timmaray nga immadayo. Namak pay no kamaten ni Lakay Berto nga ama ti balasang.  No adda mangloko iti balasangna, uray no sino ti agdepdeppa, saan a santuen ti talunasan ti lakay!

Iti partakna a timmaray, di  nakita ni Eugene ti natirad a bato a border ti kalsada ket nasikkarudna. Naidumudom ti rupana iti kalsada.

“Annayko, apo!” naiyasugna.

Ngem dagus a napukaw ti sakit a marikriknana idi masaripatpatanna ni Lakay Berto a mangiwaswasawas iti atiddog a talunasanna. Sangaagpa laengen ti baetna iti lakay idi maalana ti buelona a tumaray.

Kasla imbiat a pana a limmabas iti tianggi ni Baket Sula a pagaarimutongan dagitay padana a babbaro uray no kastoy a nepnep. Nagkakatawa dagitoy a nakakita iti langa ni Eugene ket nagsisipatda pay a nangkantiaw kenkuana.

Nakita ni Eugene nga asidegen ti lakay a mangiwagwagayway iti iggemna a talunasan isu a kasla nakabaddek iti beggang a nagpalaud a simpok iti bakante a lote.

Simmuksok iti nasamek a kaleddaan. Ngem sinurot latta ni Lakay Berto. Kasla kigaw a naipiskot ni Eugene.

“Patayenka, animal a mannirip!” uray la nga agraed ti lakay a nangilayat iti talunasan. Dua la a pulgadan ti kaadayo ti tadem ti talunasan ken ni Eugene ngem mayat man ti inaramidna a cros ober mob a kas iti garaw ni Eugene Quilban, ti paboritona nga umaayam iti PBA, isu a ti gurong ni Lakay Berto ti nagturongan ti tadem.

Kasla agemmak nga agmaya a baka ti lakay a nagpaarayat ngem saanen nga inkankano ni Eugene a kasta unayen ti partakna nga immadayo.

Kaul-ulina iti kalapawda, rinugianen ti  inana ti agaringakngak a kasla kait-itlog nga upa a kataptapuak manipud iti baki.

“Hoy, sika, Eugene, ania man ti inaramidmon?”

“Inaramid nga?” naltotan ti baro iti pannakakigtotna.    

“Agdindinamag dita tianggi ni Sula a siniripam kano ti balasang ni Lakay Berto.”

“Saan met a!”

“Mangibabainka, laglag. Dika pay la mangasawa ta bareng maikkatmo ta kinamanniripmo, langgong.”

“Nia ket ni nanangen. Bay-anyo kad’ latta toy pogi nga anakyo. Don wori, makaasawaakto latta iti hasiendera.”

“Hasiendera? Por dios por santo, Eugene, dika man agar-arapaap iti dimo magaw-at,” nasarapa pay ti baket ti barukongna.

“Wen, nanang aym nat dyoking. Wat yo hir is rayt. Hasiendera. Ket maaddaanakto metten iti Hasienda Eugene Garcia Jr.. On en maneds bay Eugene the pogi  he! he!” kasla nakatukno’t atang a timmangad iti bubong.

“Asawaem ketdin ni Emiliana nga agpatpatay kenka ta sikan ti mangmaneds iti videokena. Sikanto payen ti manggamulo iti taltalon ken piskaria a tawidna kadagiti nagawan a nagannak kenkuana.”

“Ay! Bay-amon no ni Emiliana a balkat ti maasawak. Singkuentanan san yos.”

“Agnam-ayka iti sidongna, lamiong.”

“Nagadu ket nga ammoyon, ya! Kakaisuna a nagdakkel ‘toy rimientak, diak la ket makatukma’t nasadsadiwan ngem ni Emiliana?”

“Laglag, uray ta la atiddog a poklomon a ti isugponmo iti sanikuana. Isu lat’ gunggonana a mangasawa kenka.”

“Ho, ditakay man laengen,” napasugkian ni Eugene ket nakamusiig a timmalikod.

         (Adda tuloyna)