|
ISABELA - Inawat dagiti agdadamo a mannurat a nangabak iti 10th AMMA Foundation Literary Awards ti premioda bayat ti Maika-40 a Komperensia Nasional ti GUMIL Filipinas a naangay iti Francisco L. Dy Coliseum, Cauayan City (Isabela) itay Abril 18-20.
Inawat ni Rolando D. Tubera ti Balioeg, Banna, Ilocos Norte ti premiona a P10,000 cash prize ken sertipiko ti pammadayaw gapu ti panangiyalat ti saritana a “Burrarawit” ti umuna a gunggona. Mangisursuro ni Tubera iti Banna National High School. Inyawid ni Sherma E. Benosa ti Bambang, Nueva Vizcaya iti P8,500 ken sertipiko ti pammadayaw gapu iti panangabak ti saritana nga “Alona” iti maikadua a gunggona. Nagturpos iti BA Linguistics iti University of the Philippines Diliman idi 1999, madama a sursuraten ni Benosa ti thesisna para iti MA Language Education. Inyalat ni Juviluck Ramos Basug ti Tuguegarao, Cagayan ti maikatlo a gunggona babaen ti saritana a “Ti Sagut ni Tatang” ket immawat iti P7,000 ken sertipiko ti pammadayaw. Katurturpos ni Ramos iti Computer Science itay Marso iti College of Mary Immaculate, Bulacan. Sangapulo ket siam a sarita dagiti nagsasalip. Naluktan ti salip idi Disiembre 1, 2007 ken naggibus idi Pebrero 29, 2008 para kadagiti agdadamo a mannurat ti BANNAWAG (awan pay naipablaakna a sarita iti nasao a magasin; no adda man, di nasursurok ngem tallo agingga iti Nob. 26, 2007 a bilang ti nasao a magasin). Dagiti naghurado: nagretiro a literary editor ti Bannawag Jose A. Bragado, agdama a literary editor ti Bannawag Juan Al. Asuncion, ken Noli S. Dumlao, National Commission for Culture and the Arts radio-media coordinator. Dagiti mangimatmaton itoy a pasalip: Amado I. Yoro, Mario Orbito, Mike Ulibas, Alfredo “Fred” Quibol, ken Francisco T. Ponce (agpapada nga agindegen iti Hawaii ).# |
News 
