CANDON CITY – Tallupulo a marigrigat a residente ditoy siudad ti naibangonan iti pagtaengan babaen ti panagtitinnulong ti Gawad Kalinga, Arkidioses ti Nueva Segovia, Japan Tobacco International (JTI) ken ti gobierno ditoy siudad.

Inyawat ti Gawad Kalinga ken ti JTI nga imbagian ni General Manager Roger Lamp dagiti nasao a balay iti simple a programa a naangay iti Barangay Tamurong Primero idi Nobiembre 12 kadagiti agtuturay iti Candon City iti panangidaulo ni City Mayor Allen Singson ken dagiti konsehal, barangay captains ken departments head ditoy siudad.

Timmabuno met iti programa ni Msgr. Vicente Avila, kura paroko ditoy siudad.

Tallupulo a kabarbaro a balay ti binangon ti grupo iti aganay 20,000 square meters a lote a masarakan iti Barangay Tamurong Primero babaen ti panangipalubos ti Nueva Segovia, akinkukua iti lote.

Ti JTI ti nangted iti pondo para iti pannakabangon dagiti pagtaengan idinto a ti city government ti nangibaklay iti pannakasimpa ti lote, ken dagiti kasapulan a ramit, heavy equipments ken dadduma pay a kasapulan iti pabalay. Ti met Gawad Kalinga ti nangiwanwan kadagiti benepiciaries iti pannakaipatakder dagiti pagtaengan.

Dagiti 30 a marigrigat a residente ditoy siudad nga awanan pagtaengan ti prioridad a benepisario iti nasao a pabalay.#