STA. CATALINA, Ilocos Sur – Kinuna dagiti agtuturay ditoy nga awan ti kinapudnona ti damag a nabayadanda tapno agulimekda mainaig iti mapapati a panagminas ti maysa a kompania iti kabaybayan a sakup daytoy nga ili.

“…Daydiay kunada nga alegasion a nabayadantayo, nga adda naited a permit (nga agminas), transparent amin a transaksiontayo ditoy municipal government…waya ti siasinoman nga agindeg iti Sta. Catalina… uray ti media nga umay ditoy opisinatayo… daydiay awan ti kinapudnona,” kinuna ni Mayor Carlos Asuncion.

Iti naangay a dialogo iti nagbaetan dagiti bumarangay ti Tamurong ken dagiti municipal officials ditoy, nagkaykaysa dagiti agtuturay a nangibatad nga awan ti kinapudnona iti nasao nga alegasion.

Kinuna ni Asuncion nga awan ti permit nga inted ti gobierno munisipal a pannakaminas iti kabaybayan a sakup ti ilida.

Iti immun-una nga interbiona iti media, imbaga pay ni Asuncion a total ban ti panagminas iti ilida agingga nga isu ti nakatugaw a mayor.

Ngem adda dagiti report a maysa a bapor ti makitkita iti kabaybayan a mapapati nga agminminas iti sakup daytoy nga ili.

Kanaig daytoy, maysa a resolusion ti inanamongan dagiti municipal officials a nangkiddawanda iti coast guard a nakabase iti Currimao, Ilocos Norte iti panagpatroliada iti kabaybayan a sakup daytoy nga ili tapno malapdan ti illegal a panagminas iti daytoy a paset a sakup ti Barangay Tamurong.

Itay napan a tawen, maysa a kompania ti nagaplikar iti sumagmamano nga ili ken maysa a siudad iti umuna a distrito ti probinsia nga agminasda iti kabaybayan a sakupda.

Saan nga impalubos dagiti agtuturay ti Vigan City, Caoayan ken Sta. Catalina ti panagminas ti nasao a kompania.#