NARVACAN, Ilocos Sur – Nasurok walopulo a barangay iti dua nga ili iti maikadua a distrito ti probinsia ti umuna a benepisario ti Botika ng Barangay a programa ti Vice Governors’ League of the Philippines.

Kinuna ni Vice Gov. Jerry Singson a kalpasan ti tallo a bulan a pannakataktak ti pannakaibunong dagiti ag-agas, nagtuloy met laengen a naiyawat dagitoy itay Hunio 24 ken 25 kadagiti nadumaduma a barangay ditoy nga ili ken iti Santa.

Kanaig daytoy, indagadag ni Singson, chairman ti liga dagiti bise gobernador iti pagilian, ti panangilala dagiti bumarangay daytoy inawatda a botika agsipud ta malaksid a makainutda gapu ta nalaka dagiti agas a mailako ditoy, agbalin nga economic enterprise dagiti immawat a barangay agsipud ta isuda a mismo ti mangimaton iti botika.

“Economic enterprise ti barangay daytoy. Adda pagganansiaanda. Masapul nga aywanan ken ilalaenda tapno mapadakkelda,” kinuna ni Singson.

Naiyawat dagiti ag-agas kadagiti nadumaduma a barangay ditoy nga ili itay Hunio 24 idinto nga iti Hunio 25 iti Santa.

Daytoy dua nga ili dagiti immuna a nagresponde iti surat ni Singson nga agseminar mainaig iti programa a Botika ng Barangay.

Kinuna ti bise gobernador a dagiti laeng naglasat iti training ti mabenepisiaran iti Botika ng Barangay.

Segun iti bise gobernador, agpateg iti P25,000 dagiti agas a maited iti tunggal botika.

Nupay kasta, kinuna ni Singson nga agpateg laeng iti P17,000 dagiti simmangpet nga ag-agas ngem impatalged ni Dir. Tuazon ti Botika ng Barangay iti babaen ti Office of the President ken ti Department of Health iti Region I a maitedto met la dagiti kurang nga agas.

Kabayatanna, naisayangkat ti maysa a seminar dagiti bumarangay ti Sto. Domingo ken San Ildefonso kas paset iti panagbalin ti ilida a resipiente iti programa a Botika ng Barangay.

Kinuna ni Singson a saan nga agbalin a resipiente ti Botika ng Barangay ti maysa a munisipalidad no saan nga agsanay pay nga umuna dagiti agbalinto a mangimaton iti botika ti agas.#