ITI BAET ti panangtagibassit ti Malakaniang babaen kadagiti kameng ti Gabinete ken kaaliadona kadagiti naipila nga impeachment complaint maikontra ken ni Pres. Macapagal, mapaliiw a nagkutin ti agdama nga administrasion a mangkeltay, kas iti immuna nga impeachment, daytoy a panggep ti oposision ken dagiti kritikona.

Itay napan a tawen, kineltay dagiti kaaliado ni Pres. Arroyo ti impeachment complaint nga impila ti oposision babaen iti kinakuspag ti numero ken teknikalidad.

Agdagup laeng iti 51 a miembro ti House of Representatives a pakairamanan ti sumagmamano a kameng ti koalision ti administrasion ti nagbutos iti pannaka-impeach ni Pres. Arroyo idinto a 158 ti nangibasura iti nasao a complaint.

Sumagmamano pay a kameng ti oposision a nagpirma iti impeachment complaint ti kellaat a nagpukaw idi tiempon ti panagbutos, maikontra wenno pabor iti impeachment.

Adda dagiti alegasion a nagna ti kinnaradap tapno laeng matengngel dagiti agir-iray a bumutos iti impeachment kontra ken ni Pres. Arroyo, mapapati a pannakaited iti pabor kadagiti kabagian, ken asideg kadagiti agilinlinteg a napaliiw nga agiray iti impeachment kas iti nangato a puesto iti gobierno, kontrata ken pundo. Ngem pinaglibakanda daytoy idinto nga impettengda a nagbutos kas indiktar ti konsensia ken bukodda a pagtaktakderan.

Iti pannakaipila dagiti nagsasaruno nga impeachment complaint maikontra ken ni Pres. Arroyo, adda dagiti naipadag a maragsakan nga agilinlinteg. Maysa pay ti nagkuna a posible a nasapsapa ita ti idadateng ti Paskua gapu iti pannakaisagpat ti impeachment complaint. Saanen a nasken nga bukitkiten pay ti kayat a sawen ti nasao nga agilinlinteg.

Kaadduan kadagiti kaaliado ti Presidente ti agkuna a saan nga agdur-as ti impeachment complaint agsipud ta awan ti baro a pammabasol maikontra iti Presidente a nailanad iti complaint. Kunada pay a nalasatanen ti Presidente dagiti krisis ti turayna ket saanen nga ikkan pay ti Malakaniang iti atension daytoy baro nga impeachment complaint no di ituonna ti imatangna kadagiti nadumaduma a programana a mangitag-ay iti panagbiag dagiti umili.

Ngem mapaliiw nga iti baet ti kasla di panangitaltalek ti Malakaniang iti naidatag a baro nga impeachment complaint, adda panagduaduana kadagiti kaaliadona, nangruna iti Kamara, a mangsalaknib iti Presidente.

Maibuksilan daytoy a panagduadua ti Malakaniang iti panagballaag ni Presidential Chief of Staff Michael Defensor a saan a suportaran ti administrasion ti asinoman a kameng ti Kongreso nga agtuloy a mang-impeach iti Presidente iti eleksion inton 2007.

Kinuna ni Defensor a babaen ti impeachment complaint, nalawag a makita no asino dagiti kontra wenno para iti administrasion iti panagpipili iti eleksion inton umay a tawen.

Inyunay-unay ni Defensor nga asinoman a kameng ti Kamara nga agpirma iti kabarbaro nga impeachment complaint maikontra ken ni Pres. Arroyo ket “nalawag a kontra iti Presidente ken pangulotayo” iti administration coalition.

Imballaag ni Defensor: “No adda kandidato a tumaray a mangsango kadakuada, natural a suportaranmi dagiti para ken ni Presidente.”

Nabatad met nga imbaga ni Presidential political adviser Gbariel Claudio nga asinoman a mangsuporta iti kabarbaro nga impeachment complaint maikontra ken ni Presidente Arroyo ket saanna a namnamaen ti suporta manipud iti administrasion.

Nalawag ngarud a saan nga agpampamayan ti administrasion nga agdur-as ti kabarbaro nga impeachment complaint babaen ti panangriendana kadagiti kameng ti Kamara. Kasapulan nga agtakderda iti likudan ti Presidente wenno saan, awan ti bendision a maited kadakuada, nangruna iti umadani nga eleksion.

Manamanama ngarud nga awan ti pagturongan dagiti nagsa-saruno a complaint a naipila iti Kamara maikontra iti Presidente no di ti pannakaibasurana. Pagyamanantayo daytoy kadagiti agilinlinteg iti Kamara a saan a makaadayo iti pandiling ti Presidente agsipud ta kasapulanda ti suportana tapno agtultuloy ti panagrimat ti bituenda iti politika iti probinsiada. Kadagitoy a politiko, saan a nasken a mabukitkit no ania ti talaga a napasamak iti eleksion idi 2004 iti baet dagiti alegasion iti panagsuitik kas nailanad iti Hello Garci tapes ken dagiti mapapati a pannakaaramat dagiti pundo para iti pannakaitag-ay ti kandidatura ni Pres. Arroyo.

Saan a napateg kadagiti kaaliado ti Presidente iti saan a pannakatunton ti kinapudno mainaig dagitoy nga alegasion a mangted iti panagduadua iti kinalehitimo ti agdama a turay a mangkibkibkib iti kredibilidad ti agdama a mangipangulo iti pagilian. Ti laeng pannakalasatda a politikal ken ti pannakaitag-ay ti bukodda nga interes ti napateg kadakuada.

No kastoy ti klase dagiti agtuturay, ania ti namnamaen a klase ti panagbiag iti pagiliantayo?